أنا مش عارف والله لحد امتي حنفضل كده!
حفلة تعذيب يرويها: حالد البرجي أنا مش عارف والله لحد امتي حنفضل كده!
ححكلكو قصة حصلت معايا بس طويلة شوية.
الأسبوع اللي فات رحت أعمل توكيل للمحامي في الشهر العقاري زي أي مواطن عادي .. رحت الشهر العقاري اللي في المنشية سألت راح واحد قاللي روح مجمع المحاكم مفيش هنا توكيلات لمحامين.
فأخدت بعضي و رحت هناك و قعدت أدور فين المكتب بتاعهم فسألت عسكري قاللي دور علي الباب الإزاز حتلاقيه هناك فقعدت أدور إكتشفت إن المبني نصه أبواب إزاز .. المهم قعدت ألف حوالين نفسي لحد الحمد لله ما لقيت المكتب فضلت مستني دوري و أنا في منتهي السعادة إني خلاص وصلت لحد ما جه دوري ف الموظف أخد بطاقتي و بعد كده قاللي لأ إنت مش هنا إنت تروح المكتب اللي في سموحة!
قلت أمري لله أروح علي سموحة ..
بعد ما وصلت الحمد لله .. لقيت الناس فوق بعضها، المهم دخلت قعدت أدور علي أي موظف يقوللي أعمل إيه و لا أجيب ورق إيه محدش رد عليا لحد ما وصلت للمعلومة إن المفروض في استمارة كده أجيبها من الخزنة .. رحت الخزنة لقيت ناس كتير أوي علي الشباك و همة اتنين موظفات بس اللي في الخزنة علي العدد ده كله .. استنيت شوية لحد ما وصلت لشباك الخزنة و أخدت الإستمارة بالعافية و دفعت تمنها و مليت البيانات المطلوبة و رحت لرئيس المكتب عشان يقوللي علي الموظف اللي المفروض أروحله، راح كتبلي عليها أستاذ مصطفي (ده اسم الموظف من ضمن الموظفين اللي قاعدين بره اللي المفروض أروحله عشان يعمللي الورق) ..
قعدت أدور علي أستاذ مصطفي و أسأل يا جماعة فين أستاذ مصطفي محدش عارف لحد ما لقيته الحمد لله .. وقفت في الطابور و فجأة لقيت واحد من المواطنين في نص المكتب بيزعق لموظف تاني و بيقوله ألفاظ منيلة و بيشتمه هو و البلد و الناس و كل حاجة ..
ماعلينا مالناش دعوة ..
فضلت مستني في الطابور لحد الحمد لله ما وصلت لأستاذ مصطفي راح كتب شوية حاجات كده في الاستمارة و قاللي يللا روح ادفع في الخزنة و صورلي بطاقتك و الإستمارة و تعالالي تاني!
طب يا عم ما أنا كنت لسه هناك ما تدفعونا كله مرة واحدة .. أمري لله رحت الخزنة و وقفت في طابور طويل عريض كتير أوي لحد ما وصلت و الموظفة أخدت مني الإستمارة و دفعتني الرسوم و قالتلي إستني بقي لحد ما ننده عليك (اللي هو أنا مش فاهم استنى ليه ما أنا خلاص دفعت و هو كده كده وصل معفن حخده و خلاص) ..
فضلت مستني لحد ما ندهت علي اسمي .. أخدت الإستمارة و رحت أصورها هي و البطاقة لقيت مفيش غير مكنة تصوير يتيمة بس في المكتب كله و ناس كتير واقفة حواليها و كله عايز يصور المهم صورت الحاجة بعد عناء و رحت تاني لأستاذ مصطفى أخد الورق تاني و خلاني أمضي علي كزه حاجة ..
أنا بيني و بين نفسي قلت أكيد دي أخر حاجة بقي لقيته بيقولي يللا عشان تعمل الميكروفيلم .. إيه يا عم الميكروفيلم ده !! أخدت بعضي و رحت شباك الميكروفيلم (اللي أنا لحد دلوقتي مش فاهم ده إيه أصلاً ولا لزمته إيه) وقفت في الطابور بعديها بشوية واحد من اللي في الواقفين معايا سألني قاللي إنت دفعت قلتله دفعت إيه قاللي رسوم الميكروفيلم قلتله لأ معرفش أصلاً إن في رسوم و بعدين ما أنا لسه دافع مرتين قاللي لأ روح إدفع عند الراجل ده ..
رحت للراجل بتاع الدفع (ده غير الخزنة) لقيته مش طايق نفسه و الناس كلها عايزة منه باقي و هو معهوش فكة و حالته حالة لحد ما وصلتله و دفعت و وقفت في الطابور تاني .. خلصت الميكروفيلم الحمد لله و خلاص باقي ناوي أمشي واحد قاللي لسة يا بني لازم تروح لمدير المكتب يختمهالك ..
رحت للمدير لقيت ناس واقفين حواليه زي النمل و كله عايز يختم لحد الحمد لله ما لقيت واحد ابن حلال من الناس اللي واقفة أخدها مني و راح ضرب غطس جوة الزحمة دي و ختمهالي من المدير و اديهاني تاني و قاللي مبروك تقدر تمشي خلاص .. طبعاً أنا فرحتي ساعتها كانت أكبر من فرحتي ساعة ما خلصت ثانوية عامة!
السؤال هنا لحد إمتي حنفضل كده .. لحد إمتي عشان مواطن يعمل ورقة في مصلحة حكومية يطلع عين أهله .. لحد إمتي حنفضل ماشيين بالروتين العقيم ده .. أنا مش عارف و الله لحد إمتي بس يا ريت لو حد عارف يقوللي.
المصدر .
